Videoteca na AELG

Hai unhas semanas, chamáronme da Asociación de Escritores en Lingua Galega (AELG) para me facer unha videoteca e unha fototeca que pendurar na miña páxina de socia. Como me pillaba ao lado da casa, non me puiden negar e alá fun!

A fototeca aínda non está dispoñíbel (xa avisarei), mais a videoteca xa si. Son catro vídeos independentes:

  1. Lectura dun poema de Linguaxes dixitais, que tamén podedes ver aquí videopoemado. Preme aquí para ver o vídeo.
  2. Lectura dun poema de Pilar Pallarés. Preme aquí para ver o vídeo.
  3. Resposta á pregunta da orixe da miña vocación literaria e por que comecei a escribir. Preme aquí para ver o vídeo.
  4. Resposta sobre os meus referentes literarios ou que autorías alimentan a miña obra. Preme aquí para ver o vídeo.

Se non che interesan estes catro vídeos, recoméndochos igualmente porque case non me equivoquei dicindo o que pretendía, estou perfectamente maquillada e non se me notan nada as olleiras. Un luxo que se verá mellorado o día que penduren as fotos. Agardando fico recomendándovos voces e libros (no vídeo 4) do meu percurso persoal.

 

Advertisements

Micropoemario galardoado pola UDC

O pasado mes de maio estivo cargado de actos poéticos nos que participei para celebrar e conmemorar o día das Letras. Uns días antes do 17, volvín ao que supón dende hai moitos anos unha segunda casa na miña vida: a facultade de Filoloxía da Universidade da Coruña (UDC). Alí, entregáronme un galardón na modalidade en lingua galega conseguido no XXVI Premio de Creación Literaria e Ensaio da Facultade de Filoloxía da Universidade da Coruña, que se celebrou este ano. O título da obra era Escornar contra ti e, aberta a plica, estaba outra vez o meu nome.

É o cuarto premio que recollo na UDC deste tipo, polo que para os próximos anos, terei que ir pensando en participar nos premios literarios das universidades de Vigo e Santiago de Compostela. Polo de agora, lonxe xa das brincadeiras, quero pór en destaque a importancia dos premios de creación a todos os niveis (pequenos, medianos e grandes), de todos os xéneros (poesía, ensaio, teatro e narrativa; aínda que tamén se entregou premio a tradución científica) e o apoio cultural que estes precisan de todas e todos nós.

Para ilustrar a miña preocupación, comentarei que dende o primeiro que gañei da UDC no 2013 a este no 2019, pasáronse de premios para 8 categorías a só 3. Cómpre repararmos no apoio que se precisa e no traballo que hai detrás de cada convocatoria e participante.

Podes ler o micropoemario premendo aquí. 👈

Pousa-copos poéticos

O pasado 17 de maio, celebramos a festa das letras con poesía e con música. Dende a organización, fíxose posíbel que moitos dos asistentes levasen para casa pousa-copos con poemas dos poetas que recitaron ao longo do acto. No meu caso, o poema elixido foi o que abre Linguaxes dixitais e, consecuentemente, a primeira parte do libro (linguaxes corporais).

Comparto aquí o poema, que comeza co verso: «Fozabas en min a lingua». 👈

Grazas a todas as persoas que o fixestes posíbel.

Foto do pousa-copos co meu poema, lembranza do acto.

Fotos do lanzamento de Arquitecturas na Coruña

A noite do 6 de maio, demos un recital seis dos sete poetas recollidos no libro Arquitecturas. Foi no Centro Social Gomes Gaioso da Coruña e despois do acto houbo moito libro que asinar!

Pola miña banda, recitei o meu micro-poemario do libro, «Arquitectura da ausencia», e albisquei o inicio dunhas presentacións que serán un éxito tamén por outros puntos xeográficos do país. Agardando que así sexa, deixo unhas fotografías do acto.

GG
Foto: Centro Social Gomes Gaioso
Lanzamento Arquitecturas no Gomes Gaioso o 6 de maio de 2019 (3)
Foto: Laura Rey
Lanzamento Arquitecturas no Gomes Gaioso o 6 de maio de 2019 (2)
Foto: Laura Rey
Lanzamento Arquitecturas no Gomes Gaioso o 6 de maio de 2019 (1)
Foto: Laura Rey
GG2
Foto: Centro Social Gomes Gaioso
Lanzamento Arquitecturas no Gomes Gaioso o 6 de maio de 2019 (4)
Foto: Laura Rey

Día das Letras (17-maio-2019)

Aínda non chegou maio e a poesía xa está traballando para ocupar o mes completo.

Para min, é un absoluto pracer partillar este cartaz con amigos admirados e queridos do mundo da música e das letras. Sei que é unha oportunidade inesquecíbel de compartir escenario con persoas coas que xa o compartín e con outras que resulta complexo chegar a facelo. Por iso e polo que veña, grazas inmensas.

Agardo o próximo día das Letras con impaciencia, que celebrarei canda estes artistas que aparecen a continuación, colaborando cun recitado de poemas pertencentes a Linguaxes dixitais.

Haberá música, poesía e tradución de poemas a linguaxe de signos. Vindes?

Foto de Luis Mazás López.

Arquitectura da ausencia, en Arquitecturas

Acabo de publicar este novo micro-poemario👈, que está publicado en M Editora no libro Arquitecturas, libro en colaboración dun total de sete poetas.

Eu non tiven nada a ver coa elección do tema! A serio! A pesar de que teño traballado moito a arquitectura, tanto na creación como na investigación. Por iso, o meu xeito de tratar este tema está contaminado co que me vén de atrás e contrasta cos outros seis enfoques.

Foto: Alberte Momán.

Pódese adquirir dende a editorial ou nas librarías que traballan coa distribuidora Disgalibro. Ademais de, por suposto, nas presentacións.

O próximo 6 de maio, faremos o lanzamento do libro no Gomes Gaioso da Coruña. Aí poderás escoitar a seis dos sete poetas, así como mercar o libro e saber máis sobre esta publicación. O evento de Facebook está aquí. Anótao na axenda!

No entanto, podes ler aquí a miña colaboración no libro para abrir boca, mais os outros poetas teñen unha poética moi diferente que te convido a que inspecciones páxina a páxina.

Tamén podes ir escoitando a Manuel López Rodríguez dende a súa canle de YouTube, premendo aquí.

Fotos do lanzamento de Linguaxes dixitais en Compostela

A pasada noite, Linguaxes dixitais chegou, por fin, a Compostela.

Moitas grazas a todos por virdes: aos que me coñeciades e, sobre todo (coma sempre), aos que non.

As palabras de Arancha Nogueira (que me acompañou no acto e aparece nas fotos) foron amábeis e coido que proximamente poderán ser gozadas por todos os que non as escoitaron en directo. Teño esa sorte.

As próximas citas para Linguaxes dixitais son en Vigo (o 4 de maio) e en Ferrol (o 14 de xuño). Até entón, podedes (coma sempre) ver videopoemas e ler algúns poemas na lapela do libro, así como compralo para que chegue ao voso domicilio no menor tempo posíbel.

Presentación Linguaxes dixitais en Compostela (12-abril-2019) 2
Foto: Carlos Rúa Junquera
Presentación Linguaxes dixitais en Compostela (12-abril-2019)
Foto: Carlos Rúa Junquera

Linguaxes dixitais en A que cheira, papá?, por Guillermo Rodicio

Onte Estíbaliz Espinosa Río e mais Pilar García Rego lembraban no ZigZagDiario que mañá día 12 de abril estarei en Santiago de Compostela presentando o meu novo poemario e hoxe Guillermo Rodicio publica unha recensión cargada de amor e crítica meditada sobre o meu libro. E eu feliz, claro.

Podedes lelo dende a lapela de Linguaxes dixitais ou directamente na nosa revista dixital de cultura en galego A que cheira, papá?

Linguaxes dixitais no ZigZagDiario comentado por Estíbaliz Espinosa Río

O pasado 26 de marzo, estiven no ZigZagDiario (TVG) presentando o meu Linguaxes dixitais. Apenas dúas semanas despois (10 de abril), Estíbaliz Espinosa Río levou o meu libro para falar sobre el na súa sección literaria no programa, onde conxuga: ciencias, letras e divulgación.

Podedes ver o vídeo desde a lapela de Linguaxes dixitais ou dende esta ligazón directa ao programa. Ides namorar dos meus versos na súa voz! Lembrade, ademais, que poderedes ouvir os meus versos na miña voz nas próximas citas de presentacións: en Compostela o próximo día 12 de abril e en Vigo o próximo día 4 de maio.

Aproveito para recoller nesta publicación que hoxe está de aniversario unha das persoas que son motor da miña produción poética: a miña propia e particular Alois Alzheimer. 90 anos dando guerra.

Con abu en xullo do 2017 no río de San Saturnino